Ndryshimet klimatike dhe pasojat e tyre (valët e të nxehtit apo përmbytjet), pritet të shkaktojnë jo vetëm dëme në infrastrukturën e qyteteve, por edhe në shëndetin e popullatës.
Kjo përbën arsyen pse vlerësimi i shpërndarjes së zonave të gjelbra urbane merr një rëndësi të posaçme, pasi ndikon në përmirësimin e situatës lidhur me sipërfaqet e gjelbra urbane dhe sigurinë e shëndetit të qytetarëve, si pasojë e ndryshimeve klimatike.
Një studim i kryer së fundi për qytetin e Tiranës, fokusohet ne dy çështje kryesore: a) përcaktimin e sipërfaqes së gjelbër dhe shpërndarjen e saj në Tiranë, si dhe b) në marrëdhënien mes hapësirave të gjelbra dhe treguesve shëndetësorë dhe mjedisorë.
Në këtë studim, vlerësohen sipërfaqet e mbuluara me gjelbërim në 11 njësi administrative të Tiranës, bazuar në foto të vitit 2015, siguruar nga ASIG (Autoriteti Shtetëror për Informacionin Gjeohapësinor). Gjithashtu, në të vlerësohet sipërfaqja totale e gjelbër dhe shpërndarja sipas njësive administrative në Tiranë, marrëdhënien mes hapësirës së gjelbër dhe vetëvrasjeve, si dhe zhurmat dhe ndotja e ajrit në distanca të ndryshme nga pikat e monitorimit.
Pas përllogaritjeve të kryera studiuesit arritën në disa përfundime.
Mbi 27% e sipërfaqes së qytetit të Tiranës është e mbuluar me gjelbërim, por shpërndarja e sipërfaqeve të gjelbra mes njësive administrative është heterogjene dhe në kufij që variojnë nga 15% deri 40%;
Studimi konstatoi se me rritjen e gjelbërimit zhurmat kishin një tendence të rënies apo zvogëlimit;
Po ashtu, u vu re se rritja e sipërfaqeve të gjelbra uli ndjeshëm sasinë e ndotjes në ajrit, me gjithë rritjen e distancës nga pikat e monitorimit.
Për sa i përket marrëdhënies midis gjelbërimit dhe normës së vetëvrasjeve në përgjithësi nuk u vërejtën tregues të rëndësishëm, me përjashtim të njësive administrative më të urbanizuara; megjithëse të dhënat e gjeneruara u bazuan vetëm në një kampion të limituar. Për këtë arsye, autorët rekomandojnë se nxjerrja e përfundimeve për këtë marrëdhënie duhet vlerësuar më me kujdes.
Studim analizon marrëdhënien dhe tendencat mes sipërfaqeve të gjelbra dhe treguesve të ndryshëm shëndetësorë dhe mjedisorë, të cilat mund të jenë tepër të dobishme për sa i përket planifikimit dhe menaxhimit më të mirë të hapësirave të gjelbra në të ardhmen.
Autor: Prof.Asoc.Dr. Zydi Teqja
