Sipas Marrëveshjes së Parisit, Shqipëria u angazhua të reduktojë emetimet e saj të CO2 me 11,5%, krahasuar me skenarin bazë për periudhën 2016-2030, përcaktuar nё Komunikimin e I-rё kombëtar tё vendit lidhur me ndryshimet klimatike.
Në vitin 2019, Shqipëria u bё pjesë e nismës globale “NDC Partnership”, e cila synon të ndihmojё vendet të arrijnë qëllimet e tyre për klimën në rang kombëtar dhe të sigurojё se ndihma ndaj tyre, financiare dhe teknike të jetё sa më efikase. Nё tё njëjtin vit, qeveria miratoi Strategjinë Kombëtare të Ndryshimeve Klimatike, e cila përfaqëson strategjinë e zhvillimit me karbon të ulët, të vendit në kuadër të zbatimit të Marrëveshjes së Parisit.
Megjithatë, vendit i duhet të miratojë një kuadër ligjor për klimën. Aktualisht ekziston një projekt-ligj për ndryshimet klimatike. Miratimi i ligjit dhe i VKM-sё qё propozon ngritjen e njё mekanizmi për mbikëqyrjen dhe raportimin e shkarkimeve të gazeve serë, është ende në pritje.
Ligji dhe vendimi do të vendosin kuadrin institucional dhe do të përmirësojnë rregullat për mbikëqyrjen, raportimin dhe verifikimin e emetimeve të gazeve serë, në nivel sektorësh/ burimesh në përputhje me Rregulloren e Mekanizmit tё Monitorimit.
Ndërsa projektligji përfshin dispozita qё lidhen me krijimin e një politike kombëtare për ndryshimet klimatike, atij i mungon referimi i veçantë për ngritjen e një sistemi qё bazohet nё parashikime, zhvillimi i tё cilit do duhet të jetë plotësisht në përputhje me Rregulloren e Mekanizmit të Mbikëqyrjes.
Ngritja e një sistemi kombëtar inventari për mbikëqyrjen dhe raportimin e emetimeve të gazeve serë në përputhje me Rregulloren e Mekanizmit të Monitorimit (BE) 525/2013 mungon ende, sikundër theksohet në raportin vjetor tё Sekretariatit tё BE pёr Energjinë.
