Raporti i 6-të i vlerësimit të Panelit Ndërqeveritar mbi Ndryshimet Klimatike (IPCC) (IPCC, 2021) pohon se reshjet ekstreme e si rrjedhojë përmbytjet kanë pësuar një rritje në Evropën Perëndimore dhe Qendrore.
Dukuri të tilla do të vazhdojnë të rriten akoma më tepër, në rast se ngrohja globale arrin në 2 °C, që pritet të ndodhë nga mesi i shekullit, në rast se reduktimi i shkarkimeve të gazeve serrë nuk ndodh shpejt, theksohet në raport.
Ngjarjet më të fundit, ku reshjet ekstreme të shiut në Gjermani, Belgjikë, Luksemburg dhe vendet fqinje gjatë periudhës 12 deri më 15 korrik 2021, çuan në përmbytje të rënda, tregojnë qartë ndikimin e ndryshimeve klimatike.
Përmbytjet rezultuan në të paktën 184 viktima në Gjermani dhe 38 në Belgjikë dhe dëme të konsiderueshme në infrastrukturë, duke përfshirë shtëpi, autostrada, linja hekurudhore, ura dhe biznese të ndryshme. Zonat më të prekura ishin ato rreth lumenjve Ahr, Erft dhe Meuse.
Së fundi, disa shkencëtarë nga Gjermania, Belgjika, Hollanda, Zvicra, Franca, Luksemburgu, SHBA dhe MB, bashkëpunuan për të vlerësuar se deri në ç’masë ndryshimi i klimës i shkaktuar nga njeriu ndryshoi kushtet dhe intensitetin e reshjeve të mëdha që shkaktuan përmbytje.
Me anë të përdorimit të metodave të vëzhgimit, 39 studiuesit, analizuan se si ndryshimet klimatike të shkaktuara nga njeriu ndikuan në rajon.
Rezulatet e përftuara treguan se:
- Përmbytjet u shkaktuan nga reshjet e dendura të shiut gjatë një periudhe 2 ditore, klima e lagësht e ditëve përpara ngjarjes dhe faktorë lokalë hidrologjikë.
- Sasia e reshjeve të vërejtura në Ahr/Erft dhe në pjesën belge të ujëmbledhësit Meuse, thyen rekordet e reshjeve të vëzhguara përgjatë historisë.
- Studimi tregoi, se në klimën e tanishme, për një vend të caktuar brenda këtij rajoni, mund të presim mesatarisht një ngjarje të tillë çdo 400 vjet apo më shpesh, brenda rajonit më të madh të Evropës Perëndimore.
- Ndryshimi i klimës rriti intensitetin e reshjeve maksimale ditore në sezonin e verës në këtë rajon me rreth 3 – 19% krahasuar me një klimë globale, 1.2 °C më të freskët se sot. Rritja është e ngjashme edhe për veprimtarinë 2-ditore
- Mundësia që një ngjarje e tillë të ndodhë sot krahasuar me një klimë 1.2 °C më të freskët është rritur me një faktor midis 1.2 dhe 9. Përsëri e ngjashme dhe për veprimtarinë 2-ditore etj.
Studiuesit në fund theksojnë se, kjo ngjarje tregon qartë se si shoqëritë nuk janë “elastike” ndaj ngjarjeve ekstreme të motit aktual. Ne duhet të zvogëlojmë shkarkimet e gazeve serë sa më shpejt që të jetë e mundur, si dhe të përmirësojmë sistemet e paralajmërimit dhe menaxhimit të urgjencës. Duhet ta bëjmë infrastrukturën tonë “elastike ndaj klimës”. Në këtë mënyrë, zvogëlohet numri i viktimave dhe kostot, duke i bërë shoqëritë e ndryshme, më të aftë të përballojnë këto përmbytje ekstreme.
