Vendet e Ballkanit Perëndimor ashtu si dhe e gjithë bota, po përjetojnë ndryshimet e klimës të shkaktuara nga dora e njeriut në një normë të paprecedentë në historinë e njerëzimit. Pavarësisht përpjekjeve të bëra deri më tani, shkarkimet globale të gazeve serë vazhdojnë të rriten pa kufij. Shkencëtarë dhe studiues kanë dalë në përfundimin se me përqasjen “biznes si zakonisht”, do të arrijmë regjimin e ri të klimës 4°C ose më shumë të ngrohtë, përpara vitit 2100 dhe me pasoja alarmante.
Shqipëria, si dhe vendet e rajonit (Serbia, Bosnje-Hercegovina, Maqedonia, Mali i Zi dhe Kosova) teksa përpiqen për stabilitet individual dhe kolektiv, përballen edhe me sfidat shtesë të sjella nga ndryshimi i klimës. Ne e bëjmë këtë kundrejt ekonomive të dobëta, me buxhete të kufizuara për trajtimin e çështjeve të mbrojtjes së mjedisit, rregullimit apo zbatimit të pamjaftueshëm të mjedisit, pjesëmarrjes së kufizuar publike dhe tensioneve politike.
Disa studiues, vitet e fundit, kanë studiuar kuadrin e tanishëm ligjor dhe institucional mbi ndryshimet klimatike në Ballkanin Perëndimor. Objektivi kryesor i këtij studimi ishte identifikimi i pengesave kryesore në politikat e ndryshimeve klimatike dhe roli i BE-së në këtë nivel.
Përfundimet treguan, se megjithëse egzistojnë disa sfida që vendet e Ballkanit Perëndimor ende duhet të trajtojnë (të tilla si korrupsioni dhe qeverisja e dobët), procesi i pranimit në BE ka qenë shtytësi kryesor politik i ndryshimeve në rajon.
Shqipëria për shembull, ka filluar të punojë në këtë drejtim, duke identifikuar Strategjitë e Politikave që iniciojnë aktivitetet ndaj ndryshimeve klimatike në planifikimin e zhvillimit kombëtar. Integrimi dhe zbatimi i këtyre strategjive është kritik për të nxitur mjedisin e përshtatshëm e të nevojshëm, për t’u përballur me sfidat e ndryshimit të klimës duke përfshirë sa më shumë aktorë në procesin e hartimit të strategjive dhe kuadrit ligjor të ndryshimeve të klimës. Si dhe, duke mbështetur vazhdimësinë e procesit për të siguruar masa zbutëse/përshtatëse të rreziqeve nga ndryshimet klimatike në Shqipëri.
Gjithashtu, nëpërmjet përdorimit të metodave krahasuese, studiuesit treguan se kapaciteti institucional dhe zbatimi i ligjeve mjedisore janë të lidhura ngushtë me njera-tjetrën dhe se aspektet e qeverisjes kanë një ndikim të fortë në veprimtaritë mjedisore.
Për këtë arsye, rekomandohet që institucionet qeveritare dhe jo vetëm, të hartojnë/zbatojnë një politikë të përbashkët, të mirë koordinuar dhe monitoruar nga afër, e cila do të ndihmojë në adresimin e sfidave kritike të përshtatjes që paraqesin ndryshimet klimatike para Shqipërisë.
