Sipas raportit të IPCC (Paneli Ndërqeveritar për Ndryshimet Klimatike), Ndryshimet klimatike, të shkaktuara nga shkarkimi i gazeve serë në atmosferë, është një nga kërcënimet më të mëdha të shekullit të 21-të.
Ndërkohë, vitet e fundit, kanë ndodhur një sërë zhvillimesh të rëndësishme strategjike në fushën e ndryshimeve klimatike dhe mjedisin e ndërtuar me realizimin e Planit aksional të BE për Efiçiencën e Energjisë.
Sipas EPA-s (Agjencia e Shteteve të Bashkuara për Mbrojtjen e Mjedisit) në vendet e zhvilluara si SHBA dhe Britania, konsumi i energjisë në stokun e ndërtimit është përgjegjës për prodhimin e rreth 50% të shkarkimeve kombëtare. Megjithatë, është vërejtur se, angazhimet e mëdha në botë kanë qenë të drejtuara në përmirësimin e performancës energjetike të ndërtesave përfshi këtu, edhe vendet e rajonit.
Gjithashtu, hulumtimet më të reja në Evropë dhe rajon tregojnë se ndërtesat konsumojnë rreth 40% të energjisë dhe janë përgjegjëse për shkarkimin e 36% të CO2. Ndërtesat e reja konsumojnë energji dhe shkarkojnë CO2, 5 herë më pak se sa mesatarja e ndërtesave të vjetra.
Vendet e rajonit, ndërmjet tyre edhe Kosova kanë filluar zbatimin e masave të Efiçiencës së Energjisë. Zbatimi i këtyre masave është i rëndësishëm, sepse përveç kursimit të energjisë, ato ndikojnë edhe në reduktimin e shkarkimeve të gazeve serë në atmosferë, dhe si rrjedhojë në zbutjen e efekteve të ndryshimeve klimatike në vend.
Një studim i kryer së fundi në Prishtinë, ka pasur si objektiv kryesor identifikimin e faktorëve që ndikojnë në përmirësimin e efiçiencës së energjisë në ndërtesat publike të ri-konstruktuara (ndërtesat administrative, shkollat, spitalet dhe institucionet tjera) përmes implementimit të masave të kursimit të energjisë në mbështjellësin e ndërtesave, sistemet e ngrohjes dhe të klimatizimit si dhe të ndriçimit të brendshëm.
Studimi është realizuar pas implementimit të masave EE në ndërtesat publike të Prishtinës.
Analizat e rezultateve të arritura tregojnë një reduktim total të shkarkimeve të CO2, prej 12,953 t/vit ose rreth 62%, sasi mbi mesataret e reduktimit në vendet e BE-së.
Reduktimi maksimal i shkarkimeve të gazeve serë, u vërejt në ndërtesat publike (universitetet) për arsye sepse janë ndërtesa me konsum më të lartë të energjisë. Ndërsa reduktimi minimal, ishte në shkollën “Dëshmorët e Kombit” ku janë implementuar të gjitha masat e EE.
Tashmë të gjitha vendet e rajonit dhe Europës kanë filluar zbatimin e masave të EE dhe rezultatet e para të marra, janë pozitive. Prandaj është e rëndësishme që edhe Shqipëria të fillojë me zbatimin e këtyre masave dhe vendosjen e standarteve të reja në sektorin e energjisë dhe ndërtimit.
