Sipas gjetjeve të një botimi mjekësor- të publikuara në formë raporti – ndryshimet klimatike po ndikojnë rëndë në shëndetin e popullsisë, në mbarë botën. Raporti i Lancet Countdown thotë se varësia ndaj lëndëve djegëse, fosile shkakton pasiguri ushqimore, rrit rrezikun e prekjes nga sëmundjet infektive dhe sëmundjet e tjera, të lidhura me valët e të nxehtit. Sekretari i Përgjithshëm i OKB-së, António Guterres, theksoi se veprimet e udhëheqësve globalë duhet të jenë në përputhje me shkallën e rrezikshmërisë që paraqet problemi. Ky është edhe objekti i Konferencës për Klimën COP27, në Egjipt. Raporti përfshin punën e 99 ekspertëve nga organizata të ndryshme, përfshirë edhe Organizatën Botërore të Shëndetësisë (OBSH), që udhëhiqet nga University College London, MB. Raporti përshkruan se si moti ekstrem ka rritur globalisht presionin mbi shërbimet shëndetësore të cilat janë dhe vazhdojnë të përballen me pandeminë Covid-19.
Raporti zbulon se, vetëm në dy dekadat e fundit, vdekjet në nivel global, si pasojë e temperaturave ekstremisht të larta, janë rritur me dy të tretat. Në vitin 2022, janë regjistruar temperatura rekord, në të gjithë botën, përfshi Mbretërinë e Bashkuar, ku në Korrik temperaturat prekën vlerën 40°C. Temperatura të larta u shënuan edhe në pjesë të tjera të Evropës, si dhe në Pakistan dhe Kinë.
I nxehti ekstrem kontribuon në përkeqësimin, shfaqjen apo edhe agravimin e sëmundjeve kardiovaskulare dhe të frymëmarrjes, si dhe goditje nga të nxehtit dhe ndikim në shëndetin mendor. Pavarësisht implikimeve negative të shkaktuara nga temperaturat tepër të larta, sidomos në shëndet, raporti argumenton se zgjidhjet janë: “Pavarësisht sfidave, ka prova të qarta se veprimi i menjëhershëm mund të shpëtojë ende jetët e miliona njerëzve, nëse lëvizet me shpejtësi drejt energjisë së pastër dhe eficencës energjitike”.
Sipas Guterres:“Bota po fokusohet tek vendet e G20-ës, të cilat prodhojnë 80% të shkarkimeve në gaze serë. Nevojiten përpjekje seriozie nga ana e tyre për t’i ulur këto të fundit, si dhe shumë më tepër investime në energji të rinovueshme. Shëndeti i njeriut, mjetet e jetesës, buxhetet e familjeve dhe ekonomitë kombëtare po goditen në mënyrë të vazhduar, pasi varësia nga karburantet fosile është jashtëzakonisht e madhe dhe po del jashtë kontrollit të shoqërisë njerëzore” / BBC News Climate and Science
