Njё në katёr qytete në Botë ka mungesë mjetesh financiare për të përballuar pasojat e emergjencave klimatike. Dita ditës, qytetet po përballen me fenomene të tilla si, reshje të dendura dhe përmbytje, valë të tejzgjatura të nxehti, mungesat e ujit të pijshëm por edhe me dëme në infrastrukturë.
Sa më sipër është një nga përfundimet që nxjerr raporti i CDP-së (Disclosure Insight Action) botuar së fundmi. Raporti merr në studim 800 qytete në mbarë botën dhe me një popullsi në total, rreth 400 milionë banorë, nga ku rezultoi se gjatë 2020, 43% e qyteteve, nuk kishin ndërmarrë masa kufizuese lidhur me pasojat e ndryshimeve klimatike.
Në përgjithësi, Qeveritë duket se nuk financojnë plan veprimet që lidhen me ruajtjen e infrastrukturës dhe mbrojtjen e shëndetit të popullatës për shkak të krizës klimatike.
Për 25% të qyteteve të vëzhguara, arsyet e mos financimit lidhen me kufizimet e buxhetit.
Reagimi me anë të masave të veprimit, përmes financimit të duhur, do të ndikonte në uljen e risqeve nga përmbytjet apo thatësirat, ruajtjen e cilësisë së ajrit dhe ujit, përmirësimin dhe shtimin e hapësirave të gjelbra në qytete, qoftë edhe në formën e tarracave të gjelbra, etj. E vërteta është se, shumë vende po përjetojnë kohë të vështira për shkak të mungesës së financimit nga ana e qeverive. Një prej tyre edhe Tirana, kryeqyteti i Shqipërisë, i cili po përjeton çdo ditë e më tepër valët e të nxehtit dhe rritjen e intensitetit të reshjeve, me pasojë përmbytjet.
Në një prej studimeve të mëparshme, cilësohen rreziqet me të cilat po përballen sektorё tё ndryshёm tё kryeqytetit , si dhe janë propozuar masat që duhen marrë për zvogëlimin e tyre.
Autorët vënë në dukje se, përfshirja e risqeve në planifikimin urban të qytetit së bashku me përmirësimin e infrastrukturës së shërbimeve publike, mund të ndihmojë në lehtësimin e pasojave të ndryshimeve klimatike.
Pas vlerësimit të aspekteve që kanë të bëjnë me vendimmarrjet e gjelbra, autorët cilësojnë se në zonat që karakterizohen nga mbipopullimi, ndërtesat e larta dhe mungesa e hapësirave të gjelbra, apo atyre (zonave) të rrezikuara nga përmbytjet janë marrë disa masa, por ende ka mjaft për të bërë.
Vlerësimi i duhur i situatës dhe ofrimi i zgjidhjeve do të ndikonin ndjeshëm në përmirësimin e jetesës së banorëvë të kryeqytetit dhe në marrjen në konsideratë të nevojës për politika të gjelbra.
Autor: Dr. Ani Bajrami
