Ndryshimet klimatike tashmë kanë shtrirë ndikimin e tyre, kudo në Shqipëri dhe një nga sektorët më të ndikuar është menaxhimi i mbetjeve dhe veçanërisht atyre plastike. Meqënëse, këto ndryshime karakterizohen nga rritja e temperaturës apo reshjet, ato kanë një ndikim të madh në mbetjet plastike, të cilat në përbërjen e tyre kanë substanca të rrezikshme.
Plastika dhe paketimet e ushqimeve përmbajnë kontaminues të shumtë kimikë, që cilësohen si toksike (Ndotës Organikë të Qëndrueshëm ose NOQ). Është e vërtetuar tashmë, se kimikatet toksike clirohen në mjedis jo vetëm gjatë prodhimit dhe përdorimit të plastikës, por gjithashtu gjatë asgjësimit të tyre, e në veçanti gjatë procesit të djegies. Pas shkarkimit të tyre në mjedis, temperaturat e larta (pasojë kjo e ndryshimeve klimatike), ndikojnë në avullimin e më shumë NOQ-ve nga toka në ajër. Nga ana tjetër reshjet e dendura, mund të çojnë në depozitimin më të madh sipërfaqësor të NOQ-ve, si dhe në transportimin e tyre deri tek ujrat nëntokësorë.
NOQ-të janë substancat më toksike në planet dhe shkaktojnë dëme serioze nëse depozitohen në organizëm, edhe kur janë në doza shumë të vogla. Gjithashtu, për shkak të qëndrueshmërisë së lartë që i karakterizon, eleminimi i prezencës së tyre në mjedis dhe organizma është tepër i vështirë.
Së fundi, një grup organizatash jofitimprurëse, kanë kryer një studim, që kishte në fokus ndotjen që shkaktojnë toksinat e plastikës në mjedis dhe kalimin e tyre në zinxhirin ushqimor.
Për të hetuar depërtimin ndotës të e NOQ-ve në zinxhirin ushqimor, u përdorën vezët e pulave të cilat ishin ushqyer në mjedise të hapura, në afërsi të vendeve dhe objekteve ku asgjësoheshin mbetje plastike.
Vezëve të mara nga kampionët (individët) e përzgjedhur, iu kryen analizat kimike. Përzgjedhja e kampionit përfshiu marrjen e individëve në 25 zona të nxehta, me shpërndarje gjeografike në 14 vende të ndryshme që përfshinte Afrikën, Azinë, Evropën dhe Amerikën Latine.
Pas analizave kimike dhe përpunimit statistikor, u vu re se nivelet e NOQ-ve në kampionët e vezëve të pulave që lëviznin lirshëm në mjediset e kontaminuara, u vlerësuan si të rëndësishme për t’u marrë në konsideratë. Kjo për faktin se ato mund të çojnë në ndotjen e zinxhirit ushqimor, sidomos në vendet në zhvillim. Po ashtu, edhe procesi i riciklimit të plastikës shoqërohet me shkarkime të NOQ-ve shumë toksike në mjedis.
Në përfundim, autorët vënë në dukje se problemi me plastikën nuk qëndron vetëm tek menaxhimi i mbetjeve. Sipas tyre, zgjidhja e problemit duhet parë tek minimizimi i prodhimit të saj, duke shmangur kështu edhe praninë e substancave toksike. Sa më e vogël sasia e plastikës së prodhuar, aq më i vogël do jetë edhe shkarkimi në mjedis i toksinave, si rezultat i rritjes së temperaturës apo djegies së tyre. Për rrjedhojë do të zvogëlohet edhe ndikimi i tyre në zinxhirin ushqimor.
